الاثنين، 22 فبراير 2010

مش سياسية خالص ..دة كلام




انا مش سياسية ابدا ولا حتى بفهم فى السياسة

ولا منضمة لاى حزب ولا انتمى لاى طائفة

يعنى عادى شابة زى غيرى من الشباب اللى مش بستهويهم امور السياسة

يعنى بكتفى بالاخبار اللى بشوفها فى التلفزيون وبرامج الحوار على كام خبر فى الجرايد

او لما بسمع بابا وهوة بيتكلم مع صحابة او لما بابا يهزئنى شوية ويقوللى معلومة او يشرحللى حاجة ويقوللى عيب والله المفروض بدل ماتتفرجى على الافلام والاغانى الهابطة بتاعتك دى تقرئى شوية ولا تتفرجيللك على برنامج يفيدك

بس من شهرين لما شوفت كذا جروب على الفيس بوك بينبه انو لازم نعمل بطاقة انتخابية قبل شهر يناير
لانو من حقنا انو يبقى لينا صوت وانو صوتنا مهم ....الخ الخ

اتحمست وقلت فى البيت يابابا لازم اروح واعمل بطاقة انتخابية وخليت البيت كله يبقى عنده بطاقة انتخابية وقالولنا ابقى تعالوا خدوها فى شهر تلاتة ولا شهر اربعة

طب ياسيدى عملت بطاقة انتخابية وفرحت بيها وجه موضوع انو محمد البرادعى هينزل على مصر وانو هيرشح نفسة لللانتخبات

واتحمست بردة قلت اهو اى حد جديد غير عائلة مبارك وقبل مصر ماتتحول للمملكة العربية المصرية

وطبعا لما عرفت انو البرادعى ممكن يترشح قولت والله فى امل فى امل انو نتقدم بدل ماحنا بنرجع لورا ومش بنوقف

وكنت منتظره انى اتفرج على لقائة مع منى الشاذى كنت منتظره انى اشوفة اوى ...اللقاء جه امبارح واعتقد انو كلنا شوفناه

ومع انى كنت نايمة امبارح بس صحيت مخصوص عشان اتفرج علية عشان اعرف الراجل دة بيفكر ازاى لانى ولا مره عمل لقاء على الهوا مباشرة يتكلم بيه على ترشيحة للرئاسة

كنت عوزة اعرف هيقول اية

بصراحة عجبنى ...مع انى كان بيتكلم بمنتهى الهدوء مش عارفة الهدوء قبل العاصفة ولا اية

عجبنتنى اوى كلمتة قوتى من فكرتى

عجبنى انو عاوز يغير الدستور وطريقة الترشيح وان دة مبدءة عشان يترشح للرئاسة لانو مش ينفع يترشح الا لما يتغير الدستور

لما الناس اتصلت وقالتله اعمل حزب ورشح نفسك مش عارفة هما مااخدوش بالهم ولا اية هوة بيقول انو لو عمل حزب بالطريقة الغبية اللى ماشية بيها مصر يبقى هوة مش عمل حاجة

احنا مش عوزين البرادعى بس هوة اللى يقدر يرشح نفسة عاوزين ناس تانية ترشح نفسها

بس المشكلة اية دلوقتى هنفضل نتكلم ونقول عاوزين نغير القانون عشان يقدر البرادعى او حد يرشح نفسة من غير حزب

اية المطلوب مننا دلوقتى نقوم بثورة نعمل اضراب طب حتى لو عملنا كدة ياترى هنقدر نغيرة

بجد احنا لو عزين نتغير لازم نعمل حاجة لازم نحتج نوقف وقفة مع بعضة ايوة الشعب كلة الشعب الكطحون اللى بيدور على لقمة العيش


الشعب اللى خايف من بكرة فية لازم يتحرك

انا لما اتفرجت على حلقة احمد زويل فى العاشرة مساء على قد ماكان اللقلء حلو واسمتعت بية على قد مااتحسرت وزعلت اوى اوى
الراجل عاوز يساعدنا بس احنا مش عوزين يالهوى يالهوى احفظنا يارب

احنا عندنا ناس كويسة اوى علماء ناس تقدر تخلينا نتقدم بسالمشكلة ماعندناش حد يقودنا صح ماعندناش حكومة اه والله معندناش حكومة

انا عندى عشرين سنة دلوقتى يعنى فى عز شبابى انا مش مستعدة العشرين سنة اللى جاين اعيش من غير مايحصل اى تغير فى مصر غير ان يكون الرئيس اتغير من حسنى مبارك لجمال مبارك

ممكن حد يقوللى دلوقتى اية المطلوب مننا هنعمل اية يعنى عندنا الناس الكويسة اللى ممكن تتقدم بينا وهما بيتكلموا ومعانا ومستعدين

بس احنا هند نتكلم كتير كدة

كلام كلام....كلام كلام طب وبعدين
يابلد الكلام!!
شفتوا انا مش بحب السياسة لية عشان بتجيب احباط بتجيب الشلل

انا عندى احساس بالحماس مع الامل معاه احساس بالفشل والبرود مشاعر متلخبطة مع بعض
_________________

ماعلينا ............

اخيرا عرضوا برنامج عصير الكتب واللى هيقدمة الكاتب اللذيذ بلال فضل
البرنامج كانت اول حلقة لية امبارح كانت حلقة ظريفة ابقوا اتفرجوا علية
البرنامج بيجى كل يوم احد الساعة 7

على قناهة دريم2
والاعادة يوم الاثنين الساعة 4
_________________


هوة صحيح اليومين دول نلبس صيفى ولا شتوى بجد حاجة تحير ؟؟؟؟؟؟

هناك 7 تعليقات:

adel يقول...

الصراحة بكؤه مني الشاذلي لذلك شفت لقاؤه قبلها بيوم مع عمرو اديب

الرجل بيتكلم كويس بس الحقيقو لسه مبنش هو فعلا ناوي يساعد في التغير بترشيحه او ترشيح غيره
ولا مجرد ارجوز للسطلة زي غيره

برنامج عصير الكتب رائع بجد
بموت في بلال فضل
واحل جزء مناقشة الكتاب بتاع البروفسيور الهندي :)
هموت و اجيبه :):)

TWEETY يقول...

السلام عليكم
ازيك ياطانت
انا مبسوطة انى زرت المدونة
كمان انا جاية اقولك ابقى تعالى احضرى الحفلة فى المدونة ماشى
مع السلامة هبقى اجى ازورك تانى

بــــ الخطاب ــن يقول...

الإحساس بالفشل بيهد أى حاجه قبل ما تبدأ ...........
علشان نتغير لازم نتمسك بفكرتنا ونقولها فى كل مكان لحد ما تبقى غالبيتنا عايزه تتغير ساعتها بس ماحدش هايقدر يوقفنا .
سمعتى عن شاه إيران وإزاى كان بيحكم شعبه
كان أى حد بيحب يحلف بشئ مستحيل كان بيحلف بأنه لو اتغير لما كان بيحصل مظاهرات ضده كان بيضربها بالطائرات الحربية والدبابات .
وما حصلش التغيير إلا أما كان الرأى العام كله مش عاوزة حتى بلاط القصر بتاعه .
ساعتها يبقى التغيير .
بالنسبة للبرادعى أتمنى من كل قلبى أنه يبقى صادق بس مش عارف ليه أنا خايف وحاسس أنه مسلسل جديد بفكر وإخراج جديد ولكن....
( ويمكرون ويمكر الله والله خير الماكرين )

wella يقول...

عادل
حرام عليك حد يكره منى الشاذلى والله دى حتة عسل
معاك حق هوة بيتكلم كويس بس مش بان اوى حقيقتة لسة مش عارفين هيعمل اية
الايام جاية وهنشوف

اها صحيح البرنامج بتاع بلال فضل عجبنى اوى انا هموووووت واقرء كل حاجة كتبها صلاح جاهين على راية فى حاجات كتير مش قرنيها

wella يقول...

تويتى حبيبة قلبى
الف مليون مبرووووووك على خروج بابكى ورجوعة ليكى بالسلامة

انا جاية طبعا مواااااااااااه

wella يقول...

بن الخطاب
صحيح ويمكن دى مشكلتنا انو شعورنا بالفشل بيشلنا وبيهد اى حاجة ممكن تنجح

بالنسبة لشاه ايران احنا لازم نتعلم منهم لما يبقى الراى العام كله اتحد الشعب كلة ضدة اكيد اكيد هيحصل التغير
بس ان شاء الله المسلسل يتغير ان شاء الله

7annen يقول...

البسى شتوى مصيف ازاى معرفش