الجمعة، 23 ديسمبر، 2011

الأول:)



ياأول حب
ياأول دقة قلب
ياأول كل شئ جميل ..... بحبك

وعرفت معنى السحل


اول مرة كنت اسمع كلمة سحل مافهمتهاش كنت اول مرة اقراها اسغربتها اوى
كنت قريتها فى رواية كان يوسف زيدان بيوصف سحل هيبا فى رواية الاكثر من رائعة عزازيل
كان مشهد وصف سحل هيبا فى الرواية كانى شيفاها وهية بتسحلل فى شوارع وازقة ااسكندرية من مشهد مكتوب بغاية الدقة مشهد اثر بية اوى بية لمدة اسوبعين كنت عايشة حالة حزن على اللى قريتة وحصل لهيبا

عمرى بحياتى ماكنت اتخيل انى هسمع كلمة سحل دى تانى ولا تخيلت انى ممكن اشوفها بعيونى حقيقة

ولما شفت مشهد انتهاكات الجيش والسحل للفتاه وتعريتها افتكرت هيبا وماكنتش اقدره استوعب واصدق ان دة بيحصل فى مصر
بيحصل فى بلدى ....اهذة البلاد بلادى !!



الخميس، 15 سبتمبر، 2011

لحظات مخيفة




كنت بالامس كئيبة نوعا ما ...واليوم مازلت اشعر نفس الاحساس
حالة رقود ...حالة خوف من بضع امور اعرفها
او بالاحرى رعب ....فهذة الامور بالنسبة الى كل احلامى ..وقد جاء الوقت لتكون هذة الاحلام واقعا استمتع به بدلا من ان كانت حبيسة فى خيالاتى

كم هى مخيفة لحظات الانتظار :((

الثلاثاء، 9 أغسطس، 2011

حلو وكداب



ياترى الكذب ممكن يحللنا مشاكلنا يعنى ممكن بيه نهرب منة من اى حاجة ندور بية على اى مخرج

او ممكن الكدب ممكن يحلى حياتنا ويخلي حياتنا اجمل

ممكن لية لا بس شكلنا هيبقى وحش اوى لو الناس عرفت اننا بنكدب عليهم

بس احيانا لازم نكدب يعنى الناس مش بتسلبنا اى طريقة غير اننا نكدب يعنى كانهم بيقولوا لينا اكدبوا

بس برضة مافيش احسن من الصراحة حتى لو كانت هتخسرنا كل حاجة على الاقل هتريحنا نفسيا من جوانا
انا مع انك تقول الصدق حتى لو هتخسر كل حاجة بس دى عاوزة قلب قوى او انك تخليها على الله
اكيد يعنى ربنا خلق الكذب لسبب معين :)

انا مش بحب اللى بيكدبوا ومابحبش الكدب ومش بكدب كتير يعنى بكدب شوية صغيرة هههههههههههه كلنا مش بنحب الكدب بس كلنا بنكدب يعنى على الاقل كدبات صغيرة

الفليم دة Labor Pains بتشوف فية البطلة انها بتنقذ حياتها بالكدبة اللى كدبتها عرفت بالكدبة دى تحافظ على شغلها واترقت وبقت حياتها اسهل
واحسن
بس لما انكشف كدبها طبعا خسرت كل دة بس رجعت كسبتة تانى !!!!!!!!! مهو فليم باه لازم يتنهى نهاية سعيدة :))

الخميس، 4 أغسطس، 2011

२२ سنة





ايجب ان تستمر الحياة لماذا لاتتوقف ...
تتوقف قليلا لكى نستريح... لكى نتنفس بعمق...لكى نستجمع قوانا ...لكى نفكر قليلا مع انفسنا ...
لكى نستوعب اموراّ نظن اننا نفهمها....او اموراّ اجئلنا التفكير فيها

لماذا لانتوقف على الاقل ساعة يوميا....لكى تستريح هي على الاقل... الاتتعب!!

لااقصد اننا نتوقف من الطبيعى اننا نستطيع التوقف قليلا ولكن عندما نتوقف تستمر الحياة فى المضى قدما لاتابه لنا تعاملنا كاننا غير مرئين

الا تتوقف على الاقل ساعة يوميا .... تستريح هى على الاقل ....الا تتعب!!!

انا لااريد سوى ان تتوقف هذة الحياة ... ارديها ان تتوقف لانها من كتر سرعتها اصبحت اخطئ فى عد سنوات عمرى
مع ان سنوات عمرى قليلة ولكنى اخطئت فى عدها من سرعة الحياة
فهل تتوقف قليلا...لأاعيد حساب عمرى
_______________
__________
___

يوم الثلاثاء كان يوم عيد ميلادى كان ظريف خالى جابلى تورتة واحتفلنا احتفال صغير كدة فى العلية على قدنا
ولما سئلوا بقيتى كام سنة ياويلا ؟؟ اتخلبطت بصراحة معرفتش قولت २१ بعدين وانا بكلم صحبتنى بقولها هوة انا بقيت كام سنة قالتللى ياهبلة २२ واقعدت تضحك يااااااااااااااااااااااااااااه الوقت جرى لدرجة انى اتخلبطت انا عندى كام سنة او نسيت مش عرفة بالضبط
ههههههههههههههههههه :))

كل سنة وانا طيبة وانتوا طيبن اول مرة عيد ميلادى يجى فى رمضان :)

الاثنين، 1 أغسطس، 2011

جمعة البعطرة





ااااااااااااااااه اسبوع عجيب غريب من اول يوم الجمعة بتاع جمعة لم الشمل قصدى جمعة البعطرة
من يوم الجمعة لحد دلوقتى وانا مدايقة من اللى حصل ماحدش يفتكر انى مدايقة عشان اسلامية اسلامية الاسلام فوق راسى بس مدايقة من الطريقة البشعة اللى تقالت بيها

المفروض انها جمعة لم الشمل المفروض ان ميدان التحيرير لمطالب الثورة مش لمطالب اعلان احزاب دينة وسلفية واعلان لمرشحى رئاسة اسلامين واعلان لامريكا ان مصر كلها اسامة بن لادن يااوباما اه والله كانوا بيقلولوا كدة على المنصات اللى واقفين فيها

دة غير اللغة الغريبة اللى بيقول يايايها الناس الذين نفروا من بيوتهم وجائوا الى ميدان التحرير

نفروا اية ياعم هوة احنا فى الحج لية بتتكلم كدة ماتتكلم بلهجتك المصرية لية بتتكلم بلهجة تانية



فين هتافات الثورة ومطالبها ؟؟
فين الضغط على المجلس العسكرى عشان يسمعنا ويبطل تباطؤ؟؟؟

وانا بتفرج على التلفزيون كنت حاسة انى بتفرج على مالزيا ولا اندونسيا ماكنتش حاسة انى بتفرج على مصر ابدا

من اولها غدر كدة من اولها عدم احترام الاتفاقات الاحزاب والجماعات اتفقت انها جمعة لم الشمل
اية اللى حصل لية كدة؟؟؟؟
وتسئلهم يقلوللك مانعرفش ماحدش قالنا يارااااااااااجل امال التلفزيون عمال يقول اية من اسبوع ولا حتى النت لاوسعت منك دى المرة دى

احنا بلدنا مصر ماينفعش نربطها باسم معين ماينعش نقول عنها اسلامية بس ولا قبطية ولا فرعونية ولا مدنية ولا علمانية ولا ولا ولا .....

احنا اكبر من اى دلولة فى العالم احنا مصر ملتقى كل الحضارات والاعراق فينا من كل شى

ماينفعش تحكم على شعبها يلبس الزى السعودى وتقول علية دة زى الاسلام هوة دة مافيش غيرة

كل شعب ولية زية ولية زى الاسلامى بتاعة بص لزى الازهر دة مثلا يعتبر لبس مصر اللى بيعبر عن الاسلام

كل دولة وليها زى بص للدول وشوف الاسلامية والعلمانية شوف لبسهم مختلف ازاى

مش تحكمنى بلبس ومظهر وتقول دة لبس الاسلام

حاجة تحزن وتزعل ناس نزلت الميدان بفكر لايمكن تغيرة مش عندهم حتى قابلية انهم يفهموا يتسوعبوا اننا مش ضد بعض ناس نازلة فاكرة ان اللى فى المديان كافرين وهبوظوا مصر
ماانتة لما تكلمنى بالدين مش هعترض لاننا كلنا عاوين نطبق شرع الله بس بالعقل مش باالهمج


انا ضد اى رجل دين يتكلم فى السياسية او يحكمنا لان دى مش شغلتة احنا عاوزين رجال سياسية مش رجال دين
مش معنى كدة انى هجيب رجل سياسية كافر يحكمنا


مصر اسلامية اسلامية ومش مدنية ومش مدنية لية يااخويا
انتة فاهم يعنى اية مدنية اصلا ولا هما فهموك غلط ايوة اكيد فهموك غلط اكيد قاللولك مدنية يعنى امك تشتغل رقاصة وتمشى بشعرها فى الشارع الخ الخ من الكلام اللى تسمعة ويفور دمك ويخليك تسكت تبلم من الصدمة ماتباش قادر ترد او حتى تقول اى شى

دة حتى انتة لو متدين بجد مش هتكفرنى لو انا مختلفة معاك فكريا
مش دى طريقة ابدا ان احنا نسمع بعض احيانا كتير بحس الناس بتتخانق مع بعض وهية تقصد نفس الحاجة

ناس متدينة بالشكل فقط ولي بالفعل ياريت لو نتدين باافعالنا واخلاقنا وتصرفتنا ياريت

لكى الله يامصر

يارب فى الايام المفترجة دى اهجينا يارب واشرح صورنا واحمى مصر من اى شر يارب احمينا وعافنا واعفولا عنا يارب والله احنا غلابة شعب غلبان وطيب وعلى نياتة يارب يسر لينا اللى فية خير لينا يارب ومش تسلط علينا اى عدوا وابعد عننا الناس الغبية يارب





الثلاثاء، 19 يوليو، 2011

اريد ان اخذ جرعتى


لااعرف مالذى اشعر بة بالتحديد لكنى اشعر اننى اصبحت كاالمدمنة اتمنى رؤياك كل ساعة
اشعر انك اصبحت فى حياتى كجرعة الهروين اذا لم اخدها اتوه واصبح لااعرف اين انا او فى اى يوم نحن اذا لم اخذها تصبح ايامى كلها تشبة بعضها البعض
اصبحت اريد ان اراك ولاتهمنى اى عواقب سوف تلاقينى من نظرات الناس وكلامهم اريد ان اخذ جرعتى ولا يهمنى ماسيحصل بعد ذالك

الذى اعرفة اننى اريد ان اراك فقط فرؤياك هى التى تريحينى وتجعل لبقية يومى طعم

اريد ان اخذ جرعة رؤياك

الجمعة، 15 أبريل، 2011

ايوة كدة


ماكنتش ابدا ابدا اتخيل ولا اتصور انى فى يوم من الايام هصحى من النوم واقرء خبر
حبس مبارك الرئيس السابق १५ يوم علة ذمة التحقيق

اية حبس مبارك لا ومش كدة بس
وحبس علاء وجمال برضة
بجد بجد شئ لا يصدق
عمرى بحياتى ماتصورت انى هقرء حاجة زى كدة
سبحان الله
بجد بجد احلى خبر ممكن الواحد يصحى علية انا اقدت مذهولة هوة دة بجد حقيقى يعنى
اااااااااااااااااااااااااااااااااااااااااااااااااااااااااه الحمد الله الحمد الله

جمعة التطهير نجحت وادينا اهو فى اول جمعة تمر علينا بعد الثورة من غير اى تظاهر اول جمعة ناخدها اجازة
بجد ربنا يبارك فى ثورتنا وتكمل على خير
انا مش اقدر اوصف قد اية انا مبسوطة ومذهولة
مش عارفة انا احساسى كان اية بالصبط لما صحيت من النوم وعرفت ان مبارك وعيالة اتحبسوا يااااااااااااااااااااااااااااااه
بجد الحمد الله
صحيح يعز من يشاء ويذل من يشاء
واخيرا جة اليوم اللى تتحاسب فية يامبارك اخيرا

ومبسوطة اكتر واكتر بثورتنا كل جمعة لما تحصل مليونية تتطالب بمطالب الثورة والاصرار عليها ويتحقق المطلب دة حتى لو اتاخر بس المهم انو بيتحقق
ربنا ينصرنا على كل ظالم وفاسد ربنا يتممها على خير يارب

الجمعة، 18 مارس، 2011

هقول لا





بكره هنروح نعمل استفتاء للتعديلات الدستورية
لاول مرة بحياتى وفى حياتنا كلنا هنروح نعمل حاجة زى كدة

انا عن نفسى هروح واقول لا

لا لترقيع الدستور

لا عشان بمتتهى البساطة ابنى بلد على اساس صح اشتغل من الاول صح


انا قرييت الجملة دى على الفيس بتقول:
سألت قهوجى هتعمل ايه فى الاستفتاء؟ قال "لا" طبعابقولة ليه طبعا؟ قاللى يعنى أنا لو عملتلك كوباية الشاى دى على التفل القديم هتشربها؟؟؟؟

لا عشان مش هعرف اكون احزاب جديدة احزاب من الثورة تعبر عن الشعب بجد عشان مافيش وقت ينظموا نفسهم

لا عشان لو قلت نعم اللى هيدخوا مجلس الشعب والشورى هما الاخوان وبقايا الحزب الوطنى عشان دول هما المنظمين دلوقتى

لا للتعديلات الدستورية للدستور القديم
ونعم لعمل دستور جديد بدل ترقيع القديم ولو حتى مؤقتا طب لية اعدل دستور واعمل انتخبات مجلس شعب وشورى وبعدين انتخبات رئاسة وبعدين اعمل دستور جديد وبعدين احل مجلس الشعب والشورى واعملهم من جديد

لية اعمل كل دة وانا ممكن اعمل دستور جديد من الاول وريحينى من كل الدوشة دى

بس اهم حاجة سواء كنت نعم او لا ان احنا نحترم اراء بعض
وان شاء الله خير ويكون الافضل للبلد

الجمعة، 11 مارس، 2011

اكذب لاجلى



احتاجك وطنا ...وطنا استقر به فقد ملللت حياه الترحال التى اعيش بها

احتاجك حبيب بكل ماتحمل هذة الكلمة من معنى حبيب اثق به واطمئن معه ...حبيب اشعر معه بالامان حبيب يكذب لاجلى ويقول لى اطمئنى كل شى سوف يكون على مايرام

حبيب يكذب لاجلى لكى يطمئن قلبى واصدقة وانا اعرف انة يكذب

اصدقة لاننى اعرف انة يكذب من اجلى

وقتها فقط يكون للكذب اجمل مذاق!!

الأحد، 6 مارس، 2011

نهاية رجل شجاع


نهاية رجل شجاع اكيد ماتقصدش بالجملة دى اى زعيم عربى فاسد هرب او خلع او تنحى عن كرسيه غصب عنه لانهم بعاد عن الشجاعة بعدا تاما ولا حتى يعرفوا ريحتها

انا اقصد بيها مفيد الوحش ...ايون مفيد الوحش

مفيد الوحش اللى قطع ديل الحمار امممممممممممممم مفيد بطل رواية نهاية رجل شجاع ل حنا مينه
رواية تشدك من اول صفحة وتخليك تضحك فى الاول بس ههههههههههه
ماتعرفش لية هوة قطع ديل الحمار المسكين اللى مش عمله حاجة يعنى كانت تقدر تقول كدة نوعا من التمرد او الثورة على الوضع اللى هوة كان فية او للتسلية فقط :)

احلى حاجة انو ماحس بالذنب لانو قطع ديل الحمار ماكنش حاسس انو عمل حاجة غلط او حاجة مايصحش انو يعملها
بالعكس كان حاسس انها حاجة طبيعية

حتى لما مامته بتقولة لية كدة يامفيد
يقولها مش انا السبسس ديل الحمار هوة السبب
تقوله ازاى يعنى يقولها اصله كان طويل وفى اخرة شعر
وانا قلت اقطعة العب بية او اهش بية الدبان
هههههههههههههههههههههههههههه يابن الايه

بجد انا قريت الرواية دى مرتين اولا عشان اسلوب الكاتب الاكثر من رائع اللى يدخل جوة الحكاية وتعيش فيها
تانى حاجة لانى حبيت مفيد الوحش الللى مافيش اطيب منه برى زى الطفل بالرغم من شكل جسمه العملاق بي جواه طفل برى
وابوه ضربه والمختار ضربة ضربة مووووووووووووت وبرضة مش حس انو عمل حاجة غلط مااقتنتعش ان غلطان :)


علقت فى دماغى مفيد اللى قطع ذيل الحمار زى الشعب المصرى لما قطع سكوتة وقال باعلى الشعب يريد اسقاط النظام
واسقطه بعد ماانضرب واتهان ومحاولات اقناع ومفاوضات وبردة اللى فى دماغة فى دماغة

حسيت ان الشعب المصرى زى مفيد الوحش طيب رقيق كريم مافيش اشجع منه شهم ومن بره قوى وعملاق تخاف من شكله بس تحبه وتسترحله

تحياتى الى مفيد الوحش وتحياتى ايضا الى شعبى المصرى اللى مافيش زيه فى العالم



الخميس، 3 مارس، 2011

لسة فى امل اكيد


مساء التفائل والامنيات والاحلام اللى ممكن تتحقق بشوية صبر وتعب
بقالى مدة طويلة ماكتبتش حاجة فى المدونة شهرين تقريبا
مافيش سبب محدد بس كنت فى الفترة الاولى كان عندى امتحناتات وماكنتش بدخل على النت تقريبا والفترة التانية كنت مكسلة :)

حصلت حاجات كتيرة اوى اوى فى الفترة الاخير قامت ثورة २५ يناير وانتصرت واسقطنا الرئيس المخلوع حسنى مبارك
انا روحت ميدان التحرير وناديت باعلى صوتى الشعب يريد اسقاط النظام كانت ايام حلوة اوى اوى انك تطلب حق بصوت عالى من غير ماتخاف وحتى لو مت هتموت شهيد يعنى فى الحالتين كسبان
النهاردة اتقدم رئيس الوزراء احمد شفيق باستقالتة ودة يعتبر انتصار اخر وتحقيق لمطالب الثورة
بجد لما صحيت من النوم النهاردة وسمعت خبر استقالتة انبسطت اوى حسيت ان لسة فى امل وان الدنيا هتبقى احلى الايام اللى جاية
الايام اللى فاتت جت على فترة احباط حكومة احمد شفيق مش راضية تستقيل والقذافى اللى قاعد يموت فى شعبة كانت ايام كئيبة تحس ان خلاص مش هيحصل حاجة
بس امبارح لما سمعت اللقاء والمناظرة اللى كانت على قناة او تى فى وخناقة احمد شفيق وعلاء الاسوانى وصحيت تانى يوم اسمع خبر استقالتة فرحت اوى قلت الحمد الله
بس كان نفسى يستنى لحد يوم الجمعة ويستقيل يعنى بما انة يوم الاستقلات باه:)

الحمد الله انا بجد متفائلة انا بقيت متفائلة انا عمرى بحياتى ماكنت متفائلة زى كدة اكيد بكرة هيبقى احلى واحسن بكتير من النهاردة انا بقيت متاكدة ان بكرة احلى
:) لسة فى امل بكل تاكيد

سلامى لكم مع امنياتى بمستقبل افضل واحلى ان شاء الله