الاثنين، 1 أغسطس 2011

جمعة البعطرة





ااااااااااااااااه اسبوع عجيب غريب من اول يوم الجمعة بتاع جمعة لم الشمل قصدى جمعة البعطرة
من يوم الجمعة لحد دلوقتى وانا مدايقة من اللى حصل ماحدش يفتكر انى مدايقة عشان اسلامية اسلامية الاسلام فوق راسى بس مدايقة من الطريقة البشعة اللى تقالت بيها

المفروض انها جمعة لم الشمل المفروض ان ميدان التحيرير لمطالب الثورة مش لمطالب اعلان احزاب دينة وسلفية واعلان لمرشحى رئاسة اسلامين واعلان لامريكا ان مصر كلها اسامة بن لادن يااوباما اه والله كانوا بيقلولوا كدة على المنصات اللى واقفين فيها

دة غير اللغة الغريبة اللى بيقول يايايها الناس الذين نفروا من بيوتهم وجائوا الى ميدان التحرير

نفروا اية ياعم هوة احنا فى الحج لية بتتكلم كدة ماتتكلم بلهجتك المصرية لية بتتكلم بلهجة تانية



فين هتافات الثورة ومطالبها ؟؟
فين الضغط على المجلس العسكرى عشان يسمعنا ويبطل تباطؤ؟؟؟

وانا بتفرج على التلفزيون كنت حاسة انى بتفرج على مالزيا ولا اندونسيا ماكنتش حاسة انى بتفرج على مصر ابدا

من اولها غدر كدة من اولها عدم احترام الاتفاقات الاحزاب والجماعات اتفقت انها جمعة لم الشمل
اية اللى حصل لية كدة؟؟؟؟
وتسئلهم يقلوللك مانعرفش ماحدش قالنا يارااااااااااجل امال التلفزيون عمال يقول اية من اسبوع ولا حتى النت لاوسعت منك دى المرة دى

احنا بلدنا مصر ماينفعش نربطها باسم معين ماينعش نقول عنها اسلامية بس ولا قبطية ولا فرعونية ولا مدنية ولا علمانية ولا ولا ولا .....

احنا اكبر من اى دلولة فى العالم احنا مصر ملتقى كل الحضارات والاعراق فينا من كل شى

ماينفعش تحكم على شعبها يلبس الزى السعودى وتقول علية دة زى الاسلام هوة دة مافيش غيرة

كل شعب ولية زية ولية زى الاسلامى بتاعة بص لزى الازهر دة مثلا يعتبر لبس مصر اللى بيعبر عن الاسلام

كل دولة وليها زى بص للدول وشوف الاسلامية والعلمانية شوف لبسهم مختلف ازاى

مش تحكمنى بلبس ومظهر وتقول دة لبس الاسلام

حاجة تحزن وتزعل ناس نزلت الميدان بفكر لايمكن تغيرة مش عندهم حتى قابلية انهم يفهموا يتسوعبوا اننا مش ضد بعض ناس نازلة فاكرة ان اللى فى المديان كافرين وهبوظوا مصر
ماانتة لما تكلمنى بالدين مش هعترض لاننا كلنا عاوين نطبق شرع الله بس بالعقل مش باالهمج


انا ضد اى رجل دين يتكلم فى السياسية او يحكمنا لان دى مش شغلتة احنا عاوزين رجال سياسية مش رجال دين
مش معنى كدة انى هجيب رجل سياسية كافر يحكمنا


مصر اسلامية اسلامية ومش مدنية ومش مدنية لية يااخويا
انتة فاهم يعنى اية مدنية اصلا ولا هما فهموك غلط ايوة اكيد فهموك غلط اكيد قاللولك مدنية يعنى امك تشتغل رقاصة وتمشى بشعرها فى الشارع الخ الخ من الكلام اللى تسمعة ويفور دمك ويخليك تسكت تبلم من الصدمة ماتباش قادر ترد او حتى تقول اى شى

دة حتى انتة لو متدين بجد مش هتكفرنى لو انا مختلفة معاك فكريا
مش دى طريقة ابدا ان احنا نسمع بعض احيانا كتير بحس الناس بتتخانق مع بعض وهية تقصد نفس الحاجة

ناس متدينة بالشكل فقط ولي بالفعل ياريت لو نتدين باافعالنا واخلاقنا وتصرفتنا ياريت

لكى الله يامصر

يارب فى الايام المفترجة دى اهجينا يارب واشرح صورنا واحمى مصر من اى شر يارب احمينا وعافنا واعفولا عنا يارب والله احنا غلابة شعب غلبان وطيب وعلى نياتة يارب يسر لينا اللى فية خير لينا يارب ومش تسلط علينا اى عدوا وابعد عننا الناس الغبية يارب





هناك 5 تعليقات:

Timo.. يقول...

الواحد مصدوم قوي يا ويلا من الناس اللي فاكرين انهم (فاهمين) وللاسف بنتصدم في الاخر لما نكتشف انهم (حافظين)
وحافظين غلط كمان..
ربنا ذكر مصر في القرآن واكيد قادر انه يحميها من الفكر التطرفي الدخيل واللي عمره ما كان (اسلامي).

Timo.. يقول...

كل سنة وانت طيبة
وعجباني قوي صورة البوست قوي.
ما تعرفيش انا شوفتها فين قبل كده..؟؟
(';')

صباحك مسك وعنبر :)

wella يقول...

وانتة طيب ياتيمو ينعاد عليك رمضان بالخير يارب


شوفتها فين شوفتها فين ياترى الصورة فين ياترى هههههههههههه
انا لقطتها من مدونتك طبعا :))

نهر الحب يقول...

بصي يا ويلا
هما عندهم مشكلة كبيرة جدااا ومش فاهمينها هما فاكرين ان رفضنا للفكر ده بعد عن الدين وعن الاسلام لكن مثلاً انا واحدة من الناس رافضة ان الدين تشوهه السياسة
انا شايفة ان جميل ان الجماعات الاسلامية تكون موجودة لكن بعيد عن ساحة السياسة خالص
حلو انهم يكلمونا في الدين وبالسنة النبوية ويحاولوا يوصلونا اكتر لحاجات منعرفهاش لكن ايه دخلهم بالسياسة وليه بيربطوها بالدين ويقولوا انهم حاجة واحدة
لا انا شايفة انهم حاجتين ملهمش علاقة ببعض الا لو كانوا ليهم اغراض تانية

فيه نقطة تانية بقي للاسف جوانا اننا بنشوف تصرفات وحاجات من الجماعات دي بعيدة عن الدين تماما وبتكون شكل من بره وخلاص مع ان الدين هو المعاملة عشان كدة اكثرنا كاره الموضوع علي بعضه

بس صدقيني هو غباء منهم لأن في الأول لما كانوا بعيد كان الناس بتعطف عليهم لكن كل ما بيظهروا كل ما الناس بيبعدوا عنهم اكتر

المهم ان اللي انا متاكدة منه ان ربنا حيعملنا اللي فيه الخير ان شاء الله تفاءلي خير

wella يقول...

نهر الحب صح معاكى حق انا برضة ضد اننا نخلط الدين بالسياسة
انا ضد اننا نخلى السياسة حلال وحرام لانو ماينفعش السياسة حاجة نسيبة ماينفعش نقسها باحلال والحرام

وفعلا دلوقتى الناس بقت خايفة منهم بقت مش متعاطفة معاهم زى زمان
لكن اللى بيدايقنى انهم مش فاهمين عندهم معلومات غلط كتير لازم تتصلح

تورتنيى ياعسل