السبت، 14 سبتمبر 2013

ياعاقد الحاجبيبن


فى اغانى وافلام كنا بنشوفها واحنا صغيرين ومكناش بنفهما اصلا بس بتعلق فى ذاكرتنا وبتعلم معانا  ...احنا مش بنكون ناضجين ولا بوعينا الكامل عشان نفهم اصلا   بس فى حاجات منها بتبقى فى الروح والذاكرة
بالنسبة ليا اغانى فيروز الاندلسية ماكنتش بفهم منها حاجة بس كانت بتشدنى ... منها ياعاقد الحاجبين  دى اكتر اغنية كانت معلمة معايا
معرفش لية :) ....كنت بتخيل عليها فليم اصلا  كنت بتخيل ان فيروز بتغنى للمثل جمال سليمان  السورى  الراجل دة كنت بحبة اوى وانا صغيرة كان معلم معايا اوى كنت بحبة من مسلسل  اسمة الفصول الاربعة ...المهم ماعلينا كنت بتخيل ان فيروز بتغنيلوا الاغنية   كنت بعمل فيدو كليب  فى دماغى 
والله انا يجى منى شوية انا مخرجة :) 
بس لما كبرت وبقيت افهم نوعا ما يعنى احم احم  ...حبيبت اوى الاغنية دى  كلماتها فى منتهى الجمال الله الله الله  بجد مااقدرش اقول غير الله غير على حاجة بالروعة دى

دى القصيدة كاملة   كتبها بشارة الخوري الملقب بالأخطل الصغير


يــا عاقــد الحاجبيـن    على الجبيـن اللجيـن
إن كنت تقصد قتلي     قتـلتـنــي مـرتـيــــن
مـاذا يريبـك مـنـــي     ومــا هممـت بشيـن
أصُفرةٌ في جبيـنـي     أم رعشة في اليدين
تَمــر قــفــز غـــزالٍ     بيـن الرصيـف وبينـي
وما نصبت شـباكـي    ولا أذنـت لعــيـنــــي
تـبـدو كـأن لا ترانـي    ومـلء عـيـنك عـيني
ومثـل فعلك فـعلــي    ويلـي مـن الأحمقين
مولاي لم تبق منـي    حيـاً سـوى رمـقـيـن
صبـرت حتـى برانـي    وجدي وقرب حيـنـي
ستحرم الشعر مني    وليس هذا بهـــيـــن
أخـاف تدعو القوافي    عليك في المشرقين



الخميس، 12 سبتمبر 2013

الفتاة التى تحب الكتابة







هذا هو قدرك ان تقع فى حب فتاة تحب الكتابة ..قدرك ان تستحمل مزاجها المتقلب كموج بحر ..ان تنظرها كل صباح ان تغذى روحها بتوليفة تستطيع هى فقط ان تقدمها لنفسها  توليفة من اغانى غريببة بالنسبة اليك  فهى لها ذوق خاص مختلف كثيرا عن الذوق العام ومختلف عنك  لاتتستغربه 
قدم لهذة الفتاة كتبا فى عيد ميلادها وفى عيد الحب !! نعم لاتستغرب فالكتب عندها اغلى من المجوهرات حتى لو لم تكن تمللك ثمن هذة الكتب قدم لها فواصل للكتب 
لاتستغرب اذا وجدتها مستيقظة عند الفجر وتضع الهاند فرى على اذنيها وتكتب بشراسة  او قد تجدها تمسك القلم فقط على الاوراق لاتقاطعها هى فى عالم خاص   اذهب واصنع لها كوكبا دافئا من اللبن  وضعه جانبها  بدون ان تقاطعها  فهى دقائق وستود اليك مفعة بالحياة 
لاتستغربها ولكن لاتكذب عليها فلديها احساس قوى بالذى تقولة اذا كذبت ستعرف ولن تقول لك ان تكذب عليها... لن تتركك لانك تكذب عليها  بل ستكون محبطة الى ابعد الحدود  ...
احترس من احساسها  فهى لديها مركز استشعار قوى  ..هى لاتطلب منك ان تكون بطلا من ابطال روايتها بل تتفهم  ان لااحد كاملا  ستتفهم اخطائك وسوف تعذرك  ...فهى لاتتوقع منك ان تكون كاملا  لأن قصصها غنية بالتحولات وشخصياتها متعددة الأوجه بسبب عيوبها الكثيرة المثيرة للاهتمام هي تفهم أن الكتاب الجيد لا يجب أن يكون مليئا بالشخصيات المثالية وأن الأشرار والأخطاء التراجيدية هي ملح الكتب ...ا
لفتاة التي تحب الكتابة ستتفهم أنك بشر وأن أخطاءك واردة لذا لاتخاف ان تصارحها
لاتستغرب انها لاتخاف النهايات الحزينة هى تعرف ان الواقع مؤلم بعض الشئ عن الخيال ..تفهم ان النهايات السعيدة نادرة الحصول وتتطلب وقتا .لذا فهى تفهم الواقع جيدا وتتفهم الطبيعة البشرية وتعرف اننا بشر ولسنا ملائكة ولسنا حتى نص ملائكة بجناحاتها
اذا وجدت فتاة تحب الكتابة فحاول إبقاءها بالقرب منك لان ماستكتبة عنك سيكون ابديا ..فهى ستسخدم الكلمات لتغريك ..لتسلب لك عقللك قبل قلبك ...ستجعللك تعيش وكأن فى قلبك فرقة موسيقية تعزف لك امتع الموسيقى 
وايضا ستستخدم الكلمات لتعذبك !!


لفتاة التي تحب الكتابة ستحكي لأطفالك قصصًا بالغة الجمال والسحر

لأن هذا هو أجمل ما تملكه لديها الخيال ولديها الجرأة وسيكون هذا كافيًا سوف تنقذك في محيطات حلمها ستكون فارستك، وستكون عالمك في انحناءة ابتسامتها في اللون البندقي لعينيها في الكلمات التي تنهمر منها كالسيل كالموجة ساحرة إلى درجة تجعلك تخسر أنفاسك لصالحها
ربما لا تكون متقنة تماما لقواعد اللغة، لكن لا بأس بذلك
__________________________________
مستوحاه من قراءات لااذكرها

500 days

كالعادة لما بتفرج على فليم وبيعجبنى  بفضل متأثرة بية فترة كدةا هو هعقد اسبوع فى حالة النشوة دى
الفليم اللى اتفرجت علية 500  days summer
الفليم بيبدء بالرواى وهوة بيتكلم وبيقول جملة "ما يلي ليس قصة حب، بل قصة عن الحب"  انا سمعت الجملة دى وقلت مية فى المية النهاية كئيبة لالالالالالالالالالالا قلبى الصغير لايحتمل  مش ناقصة كائبة وفى نفس الوقت محتاجة فليم اعيط فية لانى محتاجة انى اعيط  محتاجة انى اغذى الروح 
الفليم بدايتة بيفهمك ان الولد والبنت وهما صغيرين اهالييهم اتطلقوا  بس الولد فضل مؤمن بالحب اما البنت عكسة تماما فقدت الامل فى الحب 

فى مشهد باه فى اول الفليم ممكن يلخصللك كل اللى هيحصل  اول مرة اتقابلوا فيها الولد والبنت  ..الولد اسمة توم  بيشتغل شركة لكتبة البطاقات وهوة تقريبا اكتر واحد مبدع فى الشركة دى والشركة بتعتمد علية كتير  فالبنت اول يوم تشتغل فية وفى اول لقاء بنهم بصلتة نظرة عادية نضرة زى زيى اى حد فى المكتب  يعنى يادوب  ثوانى  يعنى تقريبا مش لقت فية حاجة تخليها تبصلة نظرة تانية  اما توم فضل معلق عينة علية لاكتر من دقيقة  

الفليم بيحسسك ان الولد المفروض يبقى البنت والبنت المفروض تبقى الولد ...لان الولد حساس زيادة عنها   اما هية مشاعرها جافة  تحس انها جاية تتسلى تضيع وقت مش عوزة تحب ولا ترتبط ولا تتجوز
هية قالتلة  انها مش مؤمنة بالحب ولنها مش عوزة ترتبط  وهوة قالها العكس يعنى هما كانوا صرحين مع بعض من البداية 

هوة قالها ان الحب مالوش اسباب منطقية هوة عبارة عن احساس هتحسة وتعرف ان دة الشخص المناسب 


بس الولد حبها  وهية اعجبت بيه بس مش حبتة  والاحساس دة بيقتل لوحدة لما تدى مشاعرك كلها لحد ماحبكش اصلا ...

والعلاقة بنهم تتطور بس بتبقى نص حب ونص صداقة وااااااااااااااه من العلاقات اللى بتبقى كدة  بتبقى كاانك واقف على حبل   متعلق مش عارف راسك من رجيليك 
توم يبقى فى قمة سعادتة مع احاسيسة بالحب..دائما البدايت جميلة ولها احساتس مختلف 

توم كان عاوز يعرف راسة من رجلية ...كان عاوز يسئلها احنا اللى فية دة اية  ..اسمة اية ...بس كان خايف من الاجابة عشان كدة كان عمال يئجل السؤال لان عارف انو لما يسئل السؤال دة هتبدء السعادة اللى هوة حاسسها دى ممكن تقلب بغم   ...فكان بيقول خلينى كدة من غير مااسئل ..بس من جواه عاوز يسئلها :(
 
فى مشهد حلو اوى  انو بعد ماقضوا ليلة ساخنة مع بعض  توم صحى من النوم وهوة رايح شغلة فى قمة سعادتة وبيرقص وبيغنى كانة مللك والدنيا كلها بمبى فى بمبى على راى سعاد حسنى :) 
مع انة نفس الشارع ونفس الاماكن اللى كان بيمشى فيها قبل كدة بس شافها دلوقتى  بلون تانى
عكس المشهد  لما اتفرقوا  توم ماشى حزين مكتئب  فى نفس الشارع اللى كان فرحان فية
مشهدين روعة   المخرج  عملهم بطرقة ذكية  ان  الجمال بيبقى جوة الانسان انتة لما بتكون مبسوط من جواك بتشوف الدنيا حلوة  حتى لوكنت عايش فى عشوئيات ...المهم انتة جواك اية  السعادة والجمال والاستقرار الداخلى وليس الخارجى 


لما اى حد بيحب حد فى الاول بيعشق كل حاجة فية  ولما بيتفروقا وبيبقى عاوز ينسى  بيعقد يحاول يكره كل حاجة هوة كان بيحبها عشانها   بيحاول يشوها عشان يكرها وفى بعض الاحيان بيعقد يشتم  اهو بيطلع غلة فيها 







السؤال اللى اعدت اسئل نفسى علية  فى نص الفليم لية توم حب سمر  ...وسمر مش حبتة ؟؟  لية هية مش حبتة زى ماهو حبها ؟؟ اية اللى كان ناقص فية ؟؟ 
هوة الحب بدون اسباب والارتياح بدون اسباب ..يعنى فى ناس ترتاحلهم من اول مرة وناس لا   ..بس لية على اى اساس؟؟


اخر حاجة فى الفليم امتى ننسى الشخص اللى حبناه ..امتى ننسى عذبنا ؟؟امتى ناخد تأشيرة النسيان؟؟  امتى هنكمل حياتنا بدون الحسرة لما نفتكر الشخص اللى كنا بنحبة ؟؟

طبعا سمر اتجوزت من غير مايحكلونا ازاى  ..بس سمر راحت تقابل توم فى المكان اللى هوة بيحبة     قالها مبروك  قالتلة مش تقولها اى وانتة حاسسها وهبة من قلبك   !! ضحك ابتسامة حزينة وقالها فى هذة الحالة :(   يبان هنا اوى انو لسة متعلق بيها
فى المشهد دة  هتفهم كل الاسئلة اللى كانت بتدور فى عقللك  ..قالتلة انتة كنت على حق  انتة غيرتنى فى حاجة اسمها الحب ...كل الموضوع انك انتة ماكنتش الشخص المناسب ...العيب ماكنش فيك  العيب مش بيبقى فى الطرف الاخر  العيب فى بيكون فى الماشعر ...قالتللة انا صحيت من النوم التكدت من انى بحب جوزى حتى الثمالة عرفت ان دة هوة الشخص المناسب 
هنا باه النقطة المهمة  انك لما تعرف ان الشخص اللى كنت بتحبة  مبسوط فى حياتة انتة هترتاح وهتمنالة السعادة بحق لما تشوفة مرتاح مع الشخص اللى اختاره  هتقولة مبروك وانك تتمناله السعادة من كل قلبك  زى ماتوم قالها ى الاخر
وهنا باه هتقدر تتجاوز الحزن اللى ملى قلبك وهتسمح لنفسك انك تشوف الدنيا تانى على الاقل  بلون حلو وهتسمح لروحك انها تقدر تحب تانى  وتشوف حد تانى تقدر تحبة تانى
كل شئ ممكن يكون صدفة زى ماقالت سمر .. وجدته صدفة...؟ وتكلمنا.. وفجأة أصبح زوجي..؟ :)  وللصدفة طعم اخر 


وبرضة العتاب والكلام عن السبب دة بيريحك عشان تفهم وكام السؤال اللى بيفضلة محيرينك لما تتكلم  هترتاح وبيخلى للفراق  بشكل لطيف اكتر   والذكرى بتكون انتهت نهاية حلوة ...دة لو اعتبرنا ان الفراق ممكن نجسدة بطريقة حلوة  زى مثلا ماممكن نمثل القبح بطرييقة جميلة 
وفى الاخر لازم كلنا نبدء فصل جديد :)


الخميس، 5 سبتمبر 2013

لازلت كما انا

الكلمتين اللى فى الصورة دى اختصروا كلام كتير عوزة اقولة  
لازلت احبك ولكنى تغيرت كثيرا 
لازلت احبك ولكنى نضجت كثيرا 
لازلت احبك ولكنى فهمت كثيرا 
لازلت احبك واخشى اننى لازلت احيك 
لازلت احبك 

فى اغنية كلماتها بجد لما تسمعها تحس انها طالعة من جوة جوة اوى  تحس انها معمولة عشان توجع روحك
يامن هواه اعزة واذلنى بالهوى باهوى على كلماتها ..بسمعها بحس  مش عارفة بحس بااية  بس انا روحى بتحبها


يامن هواه اعزه واذلني
كيف السبيل الى وصالك دلني

أنت الذي حلفتني وحلفت لي
وحلفت إنك لا تخون فخنتني

و حلفت إنك لا تميل مع الهوي
أين اليمين وأين ماعاهدتني

وتركتني حيران صبّا هائما
أرعى النجوم وأنت في نوم هني

عاهدتني ألا تميل عن الهوى
وحلفت لي يا غصن ألا تنثني

هبّ النسيم ومال غصن مثله
أين الزمان وأين ما عاهدتني

جاد الزمان وأنت ما واصلتني
يا باخلاَ بالوصل أنت قتلتني

واصلتني حتى ملكت حشاشتي
ورجعت من بعد الوصال هجرتني

لما ملكت قياد سري بالهوى
وعلمت أني عاشق لك خنتني

ولأقعدن على الطريق فأشتكي
فأقول مظلوم وأنت ظلمتني

ولأشكينك عند سلطان الهوى
ليعذبنك مثل ما عذبتني

ولأدعين عليك في جنح الدجى
فعساك تبلى مثل ما أبليتني



...............................

حتى الحزن له متعة وله مذاق  احلى واطعم من الفرح
القهوة ليس لها مذاق بالسكر  ...وكذاك بعض اوقات الحياه مع اننا نكره الحياه بدون سكر  لكن اللحظات التى بدون سكر هى التى نكتشف فيها اننا على قيد الحياة

>>>>>>>.>>>>>>>>>>>

انا حاسة انى زى اللى عمل حادثة بعربية  اليوم الاول مش بيكون حاسس بحاجة بيكون مصدوم مش فاهم هوة فى اية  اية اللى حصل   
تانى يوم بيحس بوجع رهيب فى روحة  وجع جة من لاشئ ...وجع يهد الروح
تالت يوم يعقد يفكر ويحاول يفهم اية الى حصلة يحاول يشوف الموقف من بعيد  يااما يفهم بجد اية اللى حصلة او يحصلة غباء ويتعمى 
وفى كلتا الحالتين هتصعب علية نفسة ويعقد يعيط  
>>>>>>>>>>>>>>>>>>>>>>>>>>>>>>>>>>>
اكتشفت انى مافقدتش القدرة على البكاء والعياط والشحتفة زى ماكنت فاكرة    ...لا دة انا  طلعت بعرف اعيط اوى 
واكتشفت كمان انى فية حاجة غريبة فى اول الصدمة بضحك ماعرفش انا بضحك لية  لا بضحك اوى  لدرجة انى بحس انى هبلة ازاى انا بضحك دلوقتى ازاى  اية اللى يضحك فى الموقف  واقعد اضحك لحد مااعيط  
>>>>>>>>>>>>>>>>>>>>>>>>>>>>>>>>

كيف السبيل الى الهدوء النفسى ...كيف السبيل الى انى اخد وقتى فى الزعل  ....حتى ابسط حقوقى انى اخد وقتى الزعل مش عارفة اخدها ..مطلوب منى انى اضحك ضحكتى الصفراء البلهاء
دة يعتبر قتل بالبطئ ..قتل للروح 
>>>>>>>>>>>>>>>>>>>...
انا اكتشفت انى عندى قدرة هائلة  للتسامح  والتفهم !!!!!!!!!!
 معرفش باه هل انا بسامح فعلا ولا بخزن جوايا وفى وقت من الاوقات هتعب ومش هقدر استحمل  وهطلع كل اللى جوايا ..معرفش  بجد ماعرفش 

بس كل اللى انا حساه ان مافيش حاجة فى قلبى شيلاها ودة فى حد ذاتة مديقنى

الثلاثاء، 3 سبتمبر 2013

عن الجواز وقرفة

خراء مجتمعى 





اكبر قرف ممكن تكون فهمتة من جواز الناس  اللى حواليك  ومش بس اللى حواليك لا دة الغالبية الغظمى فى الوطن العربى بالذات 

انهم بيتجوزا وخلاص  الاول بيوهموا نسهم  بسعادة زائفة بيسموها الحب   وبينشغلوا بجهاز الجواز ومصاريفة وكل واحد يبقى عاوز يتمنظر على الناس بان جايب اشى وشويات والحاجة الغالية اللى ماتنجبش ..وطبعا العروسة تبقى بتحاول توافق على اغنى عريس ممكن يتقدملها 
وبيتجوزا وبيفشلوا فى علاقتهم الجنسية لان اغلب الستات مش بتبقى فاهمة حاجة  وياعينى بتفضل طول حياتها عمرها ماستمتعت بعلاقة زوجية حلوة  وبتخلف عيال زى الارانب     
يخلفوا عيال وينشغلوا بقرف العيال   والسعادة الزائفة اللى كانوا  حسينها اول الجواز تقريبا بتنتهى ويفضلوا عايشين مع بعض كدة والسلام عشان المجتمع والناس مش يقولوا عليهم حاجة والعيال عشان مش يبقى اهلهم مطلقين  والناس يبصلهم نظرة وحشة ...وكمان الست لو اطلقت هتعيش منين وتاكل منين خليها عايشة فى القرف اللى هية فية بدل ماتتبهدل اكتر ماهية متبهدلة.. ويفضلوا يتخانقوات  والعيال يطلعوا معقدين نفسيا وفيهم بلاوى الدنيا  
بس خلاص ايها السادة الكرام  انتهى الكلام 

السبت، 8 يونيو 2013

لية لا


مش فارقة معايا ...ماحدش لية عندنا حاجة 
انا وانتة وشنطة فيها كراكبينا

الجمعة، 8 فبراير 2013

اهو كلام


 
مابحبش الغباء  بتنرفز من الناس الغبيبة
******************************
من حق كل واحد يكتئب ويضرب بوظ شبرين تلاتة قدامة   بس بعد كدة يقوم ويف على رجلية تانى ويصحى يشوف  هيهبب يعمل اية فى حياتة
***********************************
انا حاسة انى بقيت كائن مستهللك فقط لاغير ....بقيت كائن مش بيعمل ايتوها حاجة
****************************************
بقالى كتير ماتفرجتش على فليم هندى  ...محتاجة بجد اتفرج على فليم هندى  والله افلامهم مع انها عبيطة بس فيها كل حاجة بتيدنى دراما ورمانسية وخيال ورقص واغانى واكشن وكوميديا  كل دة فى فليم واحد  يعنى كوكتيل من مختلف المشاعر بتحسها مع بعض  فانتة بتيقى احاسيسك متلخبطة من جواك عارف انو فليم هندى  بس  مستمر برضة تتفرج علية
**********************************8
انا بقت دمعتى قريبة اوى  وبعيط على ايوتها حاجة  ..مشهد فى مسلسل عبيط  او فليم متخلف  شفتة قبل كدة
****************************
انا بقيت برضة   نفسى عوزة انفس عن غضبى وابين بجد انى متنرفزة واشتم وابهدل اللى قدامى  مش عوزة تانى اكبر دماغى واعدى
مهو فى طريقين انى ابين وجهة نظرى انى اتنرفز واشخط عشان افهم اللى قدامى  انى مدايقة منة 
او انى اكبر دماغى زى ماانا بعمل كتييييييييييييير وارد زى مااميرات ديزنى بيتكلموا والعيبة مش بتطلع من بقى ..بس جوة دماغى  بعقد اقول اللى انا عوزاه 
*************************************
انا اكتشفت انى بتكلم مع نفسى كتير  بعقد اتكلم معاها كتير ...والله نفسى دى حد طيب ولذيذ  :)  هوة دة جنان  ولا عادى :))

|********************************

بكره العتاب  وبدايق من اللى بيعقدوا يعاتبوا على الحاجات التفهة ببقى نفسى اولع فيهم
*********************************
مابحبش ارتب الهدوم واطبقها  وارتب الدولاب اصلى كل مرة برتبة  بيتنعكش تانى...المفروض يخترعوا دولاب يرتب الهدوم لوحدها
*******************************
عوزة يبقى معايا فلوس كتير  واشترى حاجات تافهة كتييييييييييييييييير
*****************************************
فى ناس بيض  ..وببقة نفسى اقولها يابيض ....................ماحدش يسئلنى تقصدى اية بمعنى كلمة بيض  لانك لو سئلتها اكيد هتبقى بيض

*****************************
مش بحب الناس اللى بتنانعر :) اهالا يعنى بيشوفوا نفسهم  وفاكرين نفسهم حاجة وهما اصلا ....يلا بلاش اشتم  عيب
********************************8
كان نفسى ابقى اسكندرنية عشان اقول كلمة احيه  براحتى  :)  ..انا حقا اعترض  دة معناها   وطبعا بما اننا مصرين بنحب نختصر الاشياء اخدنا اول حرف من كل كلمة :))
*************************
انا بقيت مدمنة شكولاتة  :(  بجد بقيت بكلها  بغباء 
***************************************
الوضع فى مصر لايبشر بخير واى كلام عن الامل دلوقتى يعتبر وقاحة  وفى نفس الوقت فقدان الامل يعتبر خيانة للثورة  بس غصب عنى  بقى الوضع لايحتمل 


بس خلاص




السبت، 2 فبراير 2013

انا منك


لا اعرف لماذا فى هذا الوقت تحديدا اكتب عنك
لم يخطر فى بالى فى اى وقت من الاوقات ان اكتب عنك 
انت الذى تحمل معانى كل شئ وعكسها
لم اتخيل يوما ما ان اكتشف ان اى شئ جميل موجود فى شخصيتى هوة منك 
انظر الى نفسى وابتسم عندما اكتشف اننى اصبحت شبية لك فى تصرفاتك وفى ردرو افعاللك
وان ايضا عيوبى مثل عيوبك  لكنى ورثت قلبى الابيض منك  ورثت طيبة القلب منك انت
لم اتخيل يوما ما ....انى ساصبح مثللك
عندما وجدت فى روحى اشياءا جميلة  فؤجئت اننى تعلمتها منك
فؤجئت حينما  اكتشفت انك الذى علمتنى الحب
علمتنى كيف احب  واستمتع بالحب وان الحياه بدون حب ليس لها لون  او كما تقول  ماسخة
كان الكل يستغرب كلامك معى حينما يعرف انك  تعلمنى كيف اسمع لفيروز  هذا الصوت الذى جائنا من كوكب اخر
كيف افهم معانى كلماتها   كيف اسمع لعبد الوهاب 
كيف علمتنى ان اقرء شعر امل دنقل
وان اعشق واحب  محمود درويش  وعنترة   وامرؤ القيس والحارث بن عبادة وكليب والزير سالم  من علمنى ان احب هؤلاء
من علمنى حب البحر  وكيف استمه لموجه   واترك روحى تغتسل بمائه
كيف علمتنى ان استمتع  بالحياه 
بااختصار كل شئ جميل موجود فى شخصيتى هو من صنعك انت
لم اتخيل ان اكتب عنك انت ولم اكتب عن امى  او عن حبيبى  لااعرف لماذا كتبت هذا الكلام 
انا دمعت وانا بكتب الكلام دة ...معرفش لية يمكن الايام دى دمعتى بقت قريبة اوى  زيادة عن اللزوم 
اليك انت  يا بابا  .....بجبك اوى  مع انك احيانا بتعصبنى وبترفزنى وبتخلينى عوزة اقرصك فى خدك اللظلوظة دة  ..واحط ايدى اللى بتبقى متلجة ديما على وشك وادايقك بيها بس بتصعب عليا ماانتة برضة ابويا :)
بحبك يابابا وعارفة انك غصب عنك بتتعصب علية وبتبهدلنى وبتشتمنى زى مااى اب مصرى عربى اصيل بيربى ولادة  بس مش اى اب  بيزعل ويجى يصالح عيالة زيك ....بحس بيك وانتة مدايق لما بتزعلنى  وتيجى تصلحنى بعديها  مش كل الابهات زيك كدة 

ومش كل الابهات  بيعلموا بناتهم الحب ويقلولهم حبى  وحسى بالحب   

بحبك يابابا   ربنا يخليك ليا  انتة وماما يارب ومايحرمنى منكوا

الجمعة، 1 فبراير 2013

سويت نوفمبر


 
من احلى الشهور اللى بحبها  شهر فبراير   شهر 2
معرفش بحبة لية   طول عمرى بحبة   كدة من غير سبب  بحس كدة انو شهر جميل لطيف لذيذ  :)... شهر فى دفئ رغم البرد اللى فية

يمكن عشان فية عيد الحب   بحس انو كدة شهر لونة احمر  :) شهر الجو بيبقى فية سقعة  شتاء
او يمكن عشان هخلص من حمل كبيير اوى كان كابس على قلبى بقالة سنة واخيرا هيخلص بعد 20 يوم من دلوقتى :)

او يمكن عشان فليم sweet november  :)
معرفش بحبه  لية المهم بحبة كدة لله فى الله :) :) 
مع ان اول يوم فية كان يوم غبى وعيطت  فية  وكان يوم  |(حلو فى وحش)  بس  برضة متفائلة انو هيبقى شهر حلو
شهر بدء فى اول ايامة بي جو  شتوى رائع مطر وبرد ورعد  ...مطر يعنى خير يعنى دعاء مستجاب يعنى امنيات تتحقق  

فى المدونات  بيقولوا انو نكتب كل يوم فى شهر فبراير معرفش لية  :) بس بما انى مش مشهورة ولا معروفة فى العالم الكبير دة فاحاول انى اكتب فى كل يوم :) اهو اشمعنا هما وانا لا


 

الثلاثاء، 22 يناير 2013

View From The Top


 الصورة دى من فليم View From The Top فليم  شوفتة مرتين بصراحة ولسة شيفاه امبارح وشدنى اكتر عن اول مرة اتفرجت علية
فليم بسيط وخفيف وبيديك طاقة كدة عشان مش تتنازل عن حلملك مهما كان
 وتعقد تحاول تدور على حلمك وتحققة ومش تفقد الامل
البطلة الحلوة دى كان عندها حلم انها تبقى مضيفة طيران وتسافر فى رحلات الدرجة الاولى وتستمع بحيتها وتتفرج على العالم :)
المهم اول مشكلة قابلتها انها واحدة بدلت ورقة الاسئلة بتاعتها من غير ماتعرف ..ولللاسف  بقت مضيفة طيران فى الطيران المحلى وطبعا هية اديقت اوى
بس مش سكتت  لما حست انى فى غلط فى الموضوع  حاولت تانى وعادلوها الامتحان ونجحت  واتحقق حلمها انها تبقى مضيفة طيران للدرجة الاولى وتسافر باريس :)
بس كان فى مشكلة انها لما بقت مضيفة طيران محلى  اتعرفت على واحد وحبوا بعض واستريحت لية   .....تخيلوا انك تحب حد دى تبقى مشكلة ..ايوة طبعا بالنسبة ليها دى مشكلة لانة ممكن حبة يعقوقها وتتنازل عن حلمها
بس هية قررت تتخلى عنة وتسيبة فى سبيبل تحقيق حلم حياتها  ظننا منها ان طيران الدرجة الاولى وانها لما تسافر باريس وتلف العالم ان دة هيحقللها السعادة
بس طبعا لا  دة كان غباء منها ..اكتشفت غلطها  ورجعت تانى لحبيبها  وقالتلة انا كنت غبية  اهم حاجة فى الدنيا ان ترجع بيتك تلاقى حد بتحبة وبيحبك مستنيك
ودة فعلا اهم حاجة فى الدنيا انك تروح بيتك تلاقى حد مستنيك  .....انك تكون عيلة حتى لو مكونة من فردين
وطبعا خلص الفليم الحمد الله على نهاية سعيدة  والمؤلف مش حب يزعلنا  وخلاها تحقق حلمها وتبقى مع حبيبها فى نفس الوقت
طبعا دى افلام ممش بيحصل كدة فى الواقع   صح النوم 
                                 **************************************************
الفليم دة فى لقطتين حلوين هما اللى فى الفليم كلة
اللقطة اللى تبقى عوزة تحقق حلمها وخلاص  حلمها اتحقق بس قرارها انها تسيب حبيبها  عشان لو فضلت معاه هتبقى بتتنازل عن حلم حياتها
هية الخطوة دى مش عارفة اوصفها بااية مش عارفة اقول ندالة ولا انها اصلا ماحبتوش عشان كدة سابتة ولا  انها انانية منها ولا اية
بس بصراحة لقتنى متضامنة معاها ايوة ..متضامنة  وقلت عندها حق  مش عارفة لية  واستغربت نفسى جدا  لما لقتنى  مش ضد اللى هية عملتة ....مع انى لو مكانها هستغنى عن حلمى وهفضل معاه :)
بس انا عجبتنى شاجعتها انها تكمل حلمها  وتجرب  عشان بعد كدة مش تندم ضعيت فرصة تحقيق حلمها..
مش عارفة لية تضامنت معاها يمكن  حاجة كدة داخلية زى حقوق المرأة ومناصرتها :)   ولا عشان احنا اتربينا ان الرجل بس من حقة هوة اللى يسعى لحلمة وشغلة اما الست اخرتها بيتها وعيالها  فديما تلاقينى معجبة وفخورة بالست اللى بتنجح فى شغلها


تانى لقطة ....لما اكتشفت ان حلمها ناقص  ...ناقص حبيبها :(
                         ************************************************
ديما لما حلمنا مش يتحقق والظروف تقف قدامة بنزعل وننكسر  ..وننسى انو ممكن يبقى فى دة خير ممكن مش بنشوفة فى وقتها بس بعدها بنفهم ...بنبقى محتاجين وقت عشان نفهم  نشوف الموضوع من بعيد  من زاوية تانية  من View From The Top 


                                             *********************************************



الثلاثاء، 15 يناير 2013

كان قرارى



انا ماكنتش عوزة حد غيرك ...ولا كان هينفع حد غيرك مهما كان

حتى فى الفترات اللى ماكنش فى امل انو تكون من نصيبى ماكنتش بشيللك من بالى  لانى ماكنتش عوزة انساك ماكنتش عوزة حد غيرك

عوزاك كدة بعيوبك قبل مميزاتك   ....لللاسف ماكنتش شايفة حد غيرك 
ماكنتش عوزة حد غيرك دة كان قرارى فى يوم من الايام وحطيتة حلق فى ودانى لحد مابقى قاعدة ماتنزلتش عنها ابدا
ماكنتش عوزة حد غيرك ....ماكنتش عوزة الا انتة

الخميس، 10 يناير 2013

بعض من قناعاتى



عندى قناعة قوية ان الكاتبة ترتبط بالاحزان ...وقتها فقط يصبح للكاتبة طعم
فاالاحزان لها بريق جذاب تعطى لللاشياء عمق  وانسانية

فى الكتابة ...فى الموسيقى ...فى كلمات الاغانى ...حتى  الالوان

عكس السعادة المزيفة التى تملكها اغلبنا  لاتعطى اى لون جذاب فى كتابة احاسيسينا سعادة مزيفة تشعرنا بزيف مشاعر  وتصبح النتيجة  كلمات  خالية من الحياة 

لذالك قليل هذة المرات التى نشعر بحياة فى كلماتنا ....






الاثنين، 7 يناير 2013

مشروع نهضة هتلر :)








كنت ديما بسئل نفسى هوة لية  هتلر حرق اليهود وقتلهم قتل جماعى ...اية اللى ممكن يحصل فى الدنيا يخلى واحد يقرر انو يمحى ناس من البشرية بسس اعتقادة انهم مجموعة حشرات
اية اللى ممكن يكون فى دماغة ساعتها  ؟؟
بس هوة قلبة مافهوش ذرة حنية  واحدة  تحنن قلبة على الناس دى  دة هوة حرق معاهم المعوقين والمتخلفين عقليا لانه كان عاوز يحسن النسل  وبالنسبة لية دول مالهمش اى لزمة فى المجتمع
فين الانسانية فى التعامل  ....فين الانسانية ؟؟


 بس لما قريت اكتر فى الموضوع دة اكتشفت ان هتلر كان فى دماغة مشروع نهضة برضة :)  بس اكيد مشروع غير مشروعنا
كان فى دماغة تحسين النسل  وانو يبقى عرقهم خالى من العيوب والامراض 
وعمل كدة بوسائل كتير منها العنصرية  والابادة لليهود ..وطبعا انو يحرق ويقتل الموعقين والمتخلفين عقليا معاهم
وانو يجوز الرجالة والستات الحلوين لبعض على اساس انهم يخلفوا عيال حلوة وبيضة ومعندهاش امراض
تفكيره ممكن تعقد قدامة بالساعات مصدوم :o

بس اللى فؤجت بية انى لقيت ان موضوع الايمان والانكار بالهولوكت دة فية اقاويل واختلافات
قتل ستة ملاين يهودى !!!  ستة مليون بنى ادام  اتقتلوا  .....اية اللى هيفدنى انى انكرها واقول انها ماحصلتش

والهولوكست بتعريف بسيط هية محرقة اليهود ...هو مصطلح استخدم لوصف الحملات النازية الالمانية للتصفية العرقية لليهود في أوروبا أثناء الحرب العالمية الثانية

ولقيت هنا  العالم الاسلامى والعربى  والعالم الاوربى مختلفين
العالم الاوربى   بيعتبروا إن إنكار الهولوكوست محرقة اليهود يعنى  يعتبر جريمه في البلدان الأوروبية ، لأنه يعتبر تحريضاً على التمييز والعنف والعنصرية وكره الاجانب.
 يعنى زى مابيقلوا ان (( ليس انكار وقوع الهولوكوست اكثر من شكل من اشكال التحريض على الكراهية ضد اليهود، مما يجعلها جريمه جنائية.))
مع ان الواحد مش بيحبهم كدة لله فى لله  ودة مذكور فى القران ان هتلاقى المسحين اقرب لقلبك  من اليهود
...بس حتى لو بكرهم  مش اقتلهم  يعنى

نيجى باه للعالم العربى والاسلامى : ان احنا انكرانا وقوع المحرقة اصلا  (( أن اليهود قد إخترعوا قصة المحرقة في محاولة لتعزيز مصالحها الخاصة. ويبدو أن هذا الاعتقاد قد أصبح مقبولا بصفة متزايدة بالنسبة لكثير من الناس في الدول العربية والاسلامية.))
بس السبب الرئيسى اللى خلى العرب ينكروا وقوع المحرقة هوة الصراع العربى الاسرائيلى
يعنى العرب  انكروها  بس السبب كان سياسى والحكومات هية اللى ادعمت الراى دة وبعض الكتاب النخبة

بس احنا كعرب ومسلمين استفدنا اية لما انكرنا وقوع المحرقة ولا اى حاجة
لاننا اكعرب ومسلمين تقريبا اعتقدوا ان هيكون خيانة للقضية الفلسطنية  على اساس ان اليهود استغلت وقوع الحرقة انها تنشئ دولتهم المزعومة اسرائيل يعنى من الاخر مافهمناش ان  الإعتراف بالهولوكوست لا يؤدي الى إنكار حقوق الفلسطينيين ، ولا انكارها يقوى أو يعزز قضيتهم.
لان اصل اهل التاريخ بيقلوا  ان مافيش علاقة بين حرق هتلر لليهود وبين ان اليهود  راحوا لفلسطين ويقرروا يعملوا دولتهم المزعومة يعنى حتى من التواريخ والاتفاقات صعب انك تقول ان المحرقة كان ليها دور فى وجود اسرائيل



يعنى من الاخر سواء انا انكرت او مانكرتش بوجود المحرقة الهلوكوست يعنى دة مالوش دعوة بالقضية الفلسطنية والاسرائلية ودة مش هيفيد اسرائيل بس اعتقد ان دة هياثر فى الانسانية انك تنكر وقوع جريمة بشعة حصلت لبشر بسبب العنصرية .

وتبقى جملة هتلر الشهيرة اللى بتقول (كان بامكانى قتل جميع يهود العالم لكنى تركت بعضا منهم  ليعرف العالم لماذا قتلتهم )
ومع انه معاه حق والله  بس ماكنش ليه اى حق انو يقتلهم   لية هوة افتكر نفسة ربنا ولا اية




الخميس، 3 يناير 2013

حلمى فين؟؟



ازاى هدور على حلمى  الجديد وسط كل الافكار الكتيرة دى  :(
فى دماغى  مليون حلم وتايه بنهم  وعوزة حد يدينى زقة  او بالاحرى  يضربنى قلمك على وشى  عشان افوق من الغيبوبة اللى انا فيها دى واعرف راسى من رجليا واعرف انا عوزة اية

انا عوزة اية ؟؟؟   



مش عوزة اندم على الوقت الضايع 

*********************************
ياما صادفت صحاب و ما صاحبتهمش

و كاسات خمور و شراب و ما شربتهمش

أندم علي الفرص اللي انا سبتهم

و الا علي الفرص اللي ما سبتهمش

عجبي !!

الأربعاء، 2 يناير 2013

صندوق الامنيات



سنة 2012  تعتبر سنة تحقيق الامنيات بالنسبة ليا 
يعنى كاان الشمعمة اللى بتطفيها كل سنة على تورتة عيد ميلادى وبغمض عينى اوووى وبقول يارب  حققلى امنياتى ....كل سنة كنت بدعى اوى وبغمض عينى اكتر
لحد ماربنا استجاب وقال لامنياتى كن فكانت وتحققت فى 2012

ومع انها سنة فيها رقمين زوجين يعنى حبتها من قبل ماتبدى 
بس ماكنتش متوقعة خالص انها تبقى حلوة كدة 

:) الحمد الله الحمد الله  بحمدك ياربى وبشكرللك  برغم كل التعب النفسى والذهنى والتوتر  والتوهان اللى حسيت بية بس انتة طمنتنى فى الاخر وحققتلى  اللى اتمنيتة 
* هقول امنياتى اللى اتحققت بللى حصلت باالترتيب:

اولها ان روحت رحلة الاقصر واسوان اللى كنت بحبم بيها من صغرى ورحتها مع اعز صاحبة ليا وكان اسبوع يجنن  ...يجنن اية كان روعة خرافة  يهبل 
بجد من احلى الاماكن اللى زورتها طول حياتى 

ثانيا انى انخطبت لروح قلبى وحياتى   الحمد الله ربنا  خلاه من نصيبى  وماحرمنيش منه
ياااااااااااااااااااااااااااااااه  الحمد الله


  ثالثا  اتخرجت اخيرا وبقيت مهندسة واخيرا خلصت من قرف الكلية والمذكرة  دول  اهم 3 امنيات كانو فى حياتى وكنت فى كل صلاة كنت بدعى بيهم ديما وربنا ماكسفنيش وحقهم ليا بعد شوية تعب حبييتن  بس الحمد الله ماانا لازم اتعب عشان احس بحلاوتهم
بس خايفة صندوق الامنيات يتقفل  والعروسة تقف ومش ترضى ترفع ايديها وترقص  والصندوق يبطل يشغل موسيقى والعروسة تفضل واقفة مكنها  مش بتتحرك ولا بتدور  خايفة فعلا اوى ....بس  هفضل متفائلة بغض النظر عن اللى حصل فى سنة 2012 من اجهاض للثورة قتل فية الامل :(